Graskers- og eplasúpa

Með sýrðum rjóma og djúpsteiktri salvíu

Guðdómlega góð og spennandi súpa sem sameinar fallegt útlit, gott bragð og himneska hollustu.

1-2 „butternut“ grasker 8750 g)
4 sæt epli
1 vænn gulur laukur, skorinn í bita
2 afhýddar og grófskornar gulrætur
2 þvegnir og grófskornir sellerístilkar
3 skalotlaukar, afhýddir og pressaðir í hvítlaukspressu
3 hvítlauksrif, afhýdd og pressuð með hvítlaukspressu
2 stk gott eplaedik
1,5 l kjúklingasoð
8 grófskorin fersk salvíulauf
ólífuolía
sýrður rjómi
maldon salt og milligrófur svartur pipar frá pottagöldrum

Djúpsteikt salvía:
5 msk ólífuolía
20 fersk salvíulauf

Stillið ofninn á 220°C undir- og yfirhita. Skerið smá sneið af báðum endunum á graskerinu og opnið síðan graskerið með því að skera það þvert yfir í tvo hluta. Takið matskeið og skafið fræin frá og hendið. Skerið síðan hvorn helminginn í ca 3 lengjur, afhýðið og skerið í 2-3 cm bita.

Skerið eplin í tvennt, gulu eplin eru best en ef þau fást ekki notið þá græn, fræhreinsið, flysjið og skerið í grófa bita.
Raðið epla- og graskersbitunum í eldfast mót. Skvettið um 4 msk af ólífuolíu yfir og kryddið vel með maldon salti og milligrófum svörtum pipar. Veltið bitunum upp úr olíu og kryddi, setjið inn í heitan ofninn og bakið í 35 mínútur eða þar til bitarnir eru orðnir meyrir og byrjaðir að taka á sig brúnan lit.
Hitið ólífuolíuna í potti. Mýkið laukinn, gulræturnar og selleríið við miðlungshita í ca 10-15 mínútur. Hrærið við og við. Bætið skalotlauk og hvítlauk saman við og steikið í 2 mínútur. Að lokum er eplaediki, kjúklingasoði og salvíu bætt saman við. Súpan hituð að suðu og látin sjóða við vægan hita í 30 mínútur.
Á meðan súpan er að sjóða er gott að djúpsteikja salvíublöðin. Hitið ca 5 msk af ólífuolíu á pönnu þar til olían er orðin nokkuð heit en varist að nota of mikinn hita. Setjið heil salvíublöð út í olíuna, nokkur í einu, og steikið þar til blöðin eru orðin stökk. Athugið að blöðin eiga að vera fagurgræn eftir steikingu en ekki brún. Eftir steikingu er gott að leggja blöðin á eldhúspappír til þerringar.  Þegar blöðin hafa þornað eru þau mulin með fingurgómum og sett til hliðar. Eftir suðu er súpan maukuð með töfrasprota eða í matvinnsluvél þar til hún er orðin alveg mjúk og slétt. Kryddið að vild með sjávarsalti og svörtum númöluðum pipar.
Setjið súpuna í skál og skreytið með sýrðum rjóma og steiktri salvíu.