Himnesk súkkulaðikaka

Botn:

300 g suðusúkkulaði
130 g ósaltað smjör, lint
6 egg, 2 heil og 4 sem búið er að skilja
175 g sykur

Fylling:

500 ml rjómi
1 tsk vanilluessins
1 msk Contreau líkjör (má sleppa)
kakóduft til skreytingar

Bræðið súkkulaðið yfir vatnsbaði og látið smjörið bráðna í súkkulaðinu. Hrærið saman tvö egg, fjórar eggjarauður og 75 g af sykri og blandið hrærunni saman við súkkulaðiblönduna.

Þeytið fjórar eggjahvítur uns þær eru orðnar að froðu, setjið þá afganginn (100 g) af sykrinum út í og haldið áfram að þeyta þar til hræran er orðin miðlungsstíf.

Blandið eggjahvítuhrærunni í litlum skömmtum saman við súkkulaðiblönduna.

Hitið ofninn í 180°C. Klæðið botninn á hringformi, sem er 23 sm í þvermál, með bökunarpappír og hellið deiginu í formið, bakið í 50 mínútur eða þar til kakan hefur lyft sér og sprungur myndast í henni. Kælið kökuna í forminu en í kjölfarið sígur hún yfirleitt í miðjunni og er það fullkomlega eðlilegt.

Hálfþeytið rjómann, bætið vanilluessins og líkjör út í hann og fullþeytið. Fyllið miðjuna á kökunni með þeytta rjómanum og sáldrið kakóduftinu yfir og skreytið með ferskum ávöxtum.