Stökkir kjúklingaleggir á fjóra vegu

12 kjúklingaleggir
2 hvítlauksgeirar, pressaðir
1 msk. engifer, fínt saxað
1/2 chili-aldin, fræhreinsað og
skorið í sneiðar
1 tsk. kjúklingakraftur

Setjið allt í pott, ásamt svo miklu vatni að rétt fljóti yfir leggina,
og sjóðið við vægan hita í 20-25 mín.Takið leggina úr vatninu og
kælið. Útbúið hjúp (sjá uppskriftir)og veltið leggjunum upp úr
honum.

Djúpsteikið leggina í 170-180°C heitri olíu í 3-5 mín. eða þangað til leggirnir eru orðnir fallega brúnir og heitir í gegn.
Einnig má steikja þá í 200°C heitum ofni í 7-10 mín. eða þangað
til þeir verða fallega brúnir.

Kókós- og karríhjúpur
1-2 msk. karríduft
2 dl hveiti
2 egg, pískuð
2 dl rasp
1 dl kókosmjöl

Blandið saman karríi og hveiti,veltið leggjunum upp úr blöndunni og síðan upp úr eggjunum. Blandið raspinu saman við kókosmjölið og veltið leggjunum að síðustu upp úr því.

Kryddjurta hjúpur
1 dl hveiti
1 msk. blandað jurtakrydd
salt og pipar
2 egg, pískuð
2 dl rasp
1-2 hvítlauksgeirar, pressaðir
1 dl fínt saxaðar kryddjurtir, t.d.
basil, steinselja, tímían, estragon
eða graslaukur
2 msk. parmesanostur

Blandið saman hveiti, jurtakryddi,salti og pipar og setjið í skál. Þá
er raspinu, kryddjurtunum, hvítlauknum og parmesanostinum blandað saman í aðra skál.Veltið leggjunum fyrst upp úr hveitiblöndunni,þá upp úr eggjunum og síðast upp úr raspinu.

Hnetuhjúpur
1 dl hveiti
1 tsk. kjúklingakrydd (chicken seasoning)
2 egg, pískuð
1-2 tsk. hnetusmjör
1 dl rasp
1 dl blandaðar hnetur, kurlaðar

Blandið saman hveiti og kjúklingakryddi. Þeytið saman egg og hnetusmjör. Blandið saman raspi og hnetukurlinu. Veltið leggjunum fyrst upp úr hveitiblöndunni, þá upp úr eggjunum og síðast upp úr raspinu.

Mexikóskur nachos-hjúpur
1 dl hveiti
1-2 msk. blandað mexíkókrydd
2 egg, pískuð
2 dl nachos, kurlað í matvinnsluvél

Blandið saman hveiti og kryddi og veltið leggjunum fyrst upp úr
blöndunni, síðan upp úr eggjunum og að lokum upp úr nachoskurlinu.

Umsjón: Úlfar Finnbjörnsson
Úr Gestgjafanum