Kjúklingur að ítölskum hætti (Fyrir fjóra)
Parmavafðar og fylltar kjúklingabringur með mascapone, sítrónu og timjan.

4 kjúklingabringur
4 sneiðar ítölsk skinka (parma  eða álíka)
1 dós mascarpone
timjan - 1 búnt
safi úr 1 sítrónu
börkur af 1 sítrónu
kjúklingasoð 1 1/2 - 2 dl
olía
hvítvín 1/2 - 1 dl
salt og pipar

Ostur, krydd og sítrónubörkur og safi hrært vel saman. Vasi skorinn í kjúklingabringurnar og fyllingin sett inn í og einni sneið af parmaskinku vafið utan um.
Smá mauki haldið til hliðar til að setja í sósuna í lokin.
Bringurnar eru steiktar á vel heitri pönnu upp úr olíunni báðum megin og kryddað með salti og pipar. Hvítvíni hellt yfir, hitinn lækkaður og soðið í smástund.
Kjúklingasoðinu síðan bætt við. Sett í ofnfast fat og skellt inn í 200 gráðu heitan ofn og látið bakast í 8 mínútur. Þá tekið út, bringurnar settar til hliðar og haldið heitum, en safanum er hellt aftur á pönnuna. Smá mascarpone-mauki bætt út í og hrært vel. Sósunni hellt yfir bringurnar.
Borið fram með salati úr klettasalati, skornum jarðaberjum og parmessanosti. Salatsósa er hrist saman úr jöfnum hluta af góðri ólífuolíu og balsamediki, e.t.v. með smá stítrónusafa með.