Heitt kjúklingasalat

2 msk ólífuolía
3 kjúklingabringur, beinlausar og hamflettar
1 tsk paprikuduft
nýmalaður pipar
salt
100 ml hvítvín (eða vatn og smáskvetta af hvítvínsediki)
100 ml vatn
1/2 rauðlaukur, saxaður fremur smátt
1 msk smjör
1/2 tsk sykur, eða eftir smekk
1-2 rósmaríngreinar
4 tómatar, vel þroskaðir
vænt knippi af klettasalati eða öðru góðu salati
100 g fetaostur, gjarna í kryddlegi

Grillið í ofninum hitað. Bökunarplata klædd með álpappír og dálítil olía
borin á hann. Kjúklingabringurnar kryddaðar nokkuð vel með blöndu af
paprikudufti, pipar og salti. Settar á olíuborinn álpappírinn og afganginum
af olíunni dreypt yfir. Sett undir vel heitt grillið (nálægt ristinni) og
grillað í um 6 mínútur á hvorri hlið, eða þar til bringurnar eru rétt
steiktar í gegn. Snúið einu sinni. Á meðan er vín, vatn, rauðlaukur, smjör,
sykur og rósmarín sett í pott, hitað að suðu og látið sjóða nokkuð rösklega
þar til sósan er farin að þykkna svolítið. Hrært öðru hverju. Tómatarnir
helmingaðir, fræhreinsaðir og skornir í ræmur. Rósmaríngreinarnar veiddar
upp úr, sósan smökkuð til og potturinn tekinn af hitanum. Salatinu dreift á
fat. Tómatarnir settir í pottinn, velt snöggt upp úr sósunni og síðan er
öllu hellt á mitt fatið. Kjúklingabringurnar teknar út og látnar bíða í 2-3
mínútur en síðan skornar í 1-2 cm þykkar sneiðar á ská og dreift yfir
tómatana. Fetaosti dreift yfir allt saman og borið fram með nógu af góðu
brauði.