Engiferkryddlegin London broil-steik

1,2-1,5 kg innralæri af nauti
5 cm bútur af engifer
1/2 laukur
4 hvítlauksgeirar
100 ml rauðvín
4 msk sojasósa
4 msk olía
1 tsk nýmalaður pipar
salt

Kjötið skorið í tvennt eins og vöðvaþræðirnir liggja, þannig að bitarnir
verði 3-4 cm þykkir (ef þið látið skera það af stærra stykki í búðinni,
biðjið þá um að fá það skorið þannig). Sett í eldfast fat. Engiferinn rifinn
á rifjárni og laukurinn og hvítlaukurinn einnig - það má líka saxa þetta
smátt eða setja það í matvinnsluvél. Blandað saman við rauðvín, sojasósu,
olíu og pipar og hellt yfir kjötið. Látið liggja í nokkrar klukkustundir,
jafnvel hálfan sólarhring, og kjötinu snúið öðru hverju. Grillið hitað vel.
Kjötið tekið úr leginum og hann strokinn vel af því. Saltað svolítið, sett á
grillið og grillað við góðan hita í 6-10 mínútur á hvorri hlið, eftir þykkt
og eftir því hvernig óskað er eftir að kjötið sé. Síðan er það tekið af
grillinu og látið standa í um 5 mínútur. Skorið á ská í þunnar sneiðar og
borið fram, t.d. með ofnsteiktum eða grilluðum kartöflum, grilluðu grænmeti
og e.t.v. sveppasósu eða rauðvínssósu.