Sýrlenskar kjötbollur

600 g lamba- eða nautahakk
1 laukur, skorinn í bita
2 hvítlauksgeirar, skornir í bita
hnefafylli af saxaðri steinselju
1 tsk þurrkuð mintulauf
nýmalaður pipar
salt
1 msk smjör
3 msk furuhnetur
1 dós niðursoðnir tómatar

Ofninn hitaður í 180 gráður. Hakkið sett í skál. Laukur, hvítlaukur og
steinselja sett í matvinnsluvél eða blandara og vélin látin ganga þar til
þetta er fremur fínt saxað saman. Þá er mintulaufi, pipar (nokkuð miklum) og
salti hrært saman við og síðan hellt í skálina með hakkinu og hnoðað vel
saman með höndunum. Smjörið brætt á pönnu og furuhneturnar ristaðar þar til
þær eru rétt farnar að taka lit; hrært oft á meðan og þess gætt vel að þær
brenni ekki. Hakkinu skipt í 8-12 álíka stórar bollur. Ein bolla í senn
tekin í lófann, fingri stungið ofan í hana til að gera holu, og síðan er um
1 tsk af furuhnetum sett í holuna og opið klipið aftur með fingrunum.
Bollunum raðað í eldfast fat, ekki stærra en svo að það rúmi þær og örlítið
bil sé á milli þeirra. Tómatarnir saxaðir smátt (best er þó að mauka þá í
matvinnsluvélinni), kryddaðir með dálitlum pipar og salti og dreift á milli
bollanna. Sett í ofninn og bakað í um hálftíma. Borið fram t.d. með salati
og pítubrauði
Ef til eru nokkrar kaldar, soðnar kartöflur, helst með hýði, er tilvalið að
skera þær í um 1 cm þykkar sneiðar og steikja þær gullinbrúnar á pönnu í
svolítilli ólífuolíu kryddaðri með pipar, salti og svolítilli þurrkaðri
mintu eða oregano.