Svínakjöt í salsasósu

800 g svínahnakkasneiðar
1 tsk oregano
nýmalaður pipar
salt
1-2 msk ólífuolía
1 lítill blaðlaukur, skorinn í sneiðar á ská
2-3 gulrætur, skornar í þunnar sneiðar á ská
1 krukka (350-500 g) mild salsa, helst með baunum
250 ml vatn, eða eftir þörfum

Svínahnakkasneiðarnar kryddaðar með blöndu af oregano, pipar og salti. Olían
hituð á stórri, þykkbotna pönnu (gjarna húðaðri, þá þarf líka minni olíu) og
kjötsneiðarnar brúnaðar á báðum hliðum við háan hita. Grænmetið sett á
pönnuna þegar búið er að snúa þeim. Þegar búið er að brúna kjötið er salsan
sett á pönnuna og síðan vatnið. Þegar sýður er hitinn lækkaður og látið
malla við vægan hita í 20-25 mínútur; hrært öðru hverju og vatni bætt við ef
þarf. Smakkað til með pipar og salti og borið fram, t.d. með grænu salati og
brauði, eða með kartöflum, soðnum eða frönskum.