Léttreyktur lambahryggur með hnetu- og döðlufyllingu

1 léttreyktur lambahryggur
½ poki valhnetur, pekan eða kasjúhnetur
15 stk. döðlur
2-3 sólþurrkaðir tómatar (þurrkið ef þeir eru í olíu)
ca. 2 dl rifinn gouda-ostur

Maukið hnetur, döðlur og tómata gróft í matvinnsluvél og blandið osti við. Takið lundir innan úr hrygg og hreinsið himnur vel áður en þið setjið maukið inn í hann. Leggið lundir ofan á mauk og lokið hrygg með því að sauma fyrir með garni. (Hryggur með breiðum slögum hentar vel.) Setjið hrygg í pott, hellið vatni í hann og setjið í ofn. Steikið í 45 mínútur á hvert kíló við um 180° C. Berið fram með grænmeti og ávöxtum.

Kartöfluréttur með Camembert-sósu
4 bökunarkartöflur, afhýddar og saxaðar í litla bita
1 sæt kartafla, afhýdd og saöxuð í litla bita
¼ fryst Wok-grænmeti - eða annað ferskt grænmeti
1 Camembert-ostur

Bakið bökunarkartöflur, bætið sætum kartöflum við og loks Wok-grænmeti, því þetta þarf mislangan bökunartíma. Bræðið ost í potti og gætið að ekki sjóði upp úr. Hellið yfir grænmeti og bakið í smástund. Berið fram með hrygg.