Kjöthleifur með tómötum og beikoni

400 g nautahakk, magurt
400 g svínahakk
1 laukur, saxaður smátt
2 hvítlauksgeirar, saxaðir smátt
1/2 tsk pipar, nýmalaður (eða eftir smekk)
e.t.v. svolítið salt
rifinn börkur af 1 sítrónu
20-25 saltkexkökur, fínmuldar
1 tsk oregano, þurrkað
1 tsk basilíka, þurrkuð
1/2 tsk timjan, þurrkað
1 dós tómatar, saxaðir (ekki tómatmauk)
200 g beikon, magurt

Ofninn hitaður í 170 gráður. Hakki, lauk, hvítlauk og pipar blandað vel
saman í skál. Börkurinn af sítrónunni rifinn yfir og síðan er saltkexmylsnu
og kryddjurtum dreift yfir og blandað vel. Að lokum er innihaldi
tómatdósarinnar hrært saman við (best er að gera þetta með höndunum). Klæðið
jólakökuform eða ílangt eldfast form með helmingnum af beikonsneiðunum.
Setjið hakkið í formið og sléttið. Raðið afganginum af beikonsneiðunum ofan
á og þrýstið endunum niður með börmunum. Setjið í ofninn og bakið í um 1 1/2
klst. Látið hleifinn bíða í nokkrar mínútur áður en hann er borinn fram.

Ég hafði kartöflubáta, ofnsteikta í kryddolíu, með hleifnum en soðnar
kartöflur eða kartöflustappa eiga líka vel við, svo og grænt salat.