Heilsteiktur kalkúnn án fyllingar

Fyrir 10 manns

1 kalkúni, um það bil 6 kíló

3 msk. bráðið smjör

1 tsk. salt

½ tsk. pipar

Kalkúninn þarf að þiðna í ísskáp í tvo sólarhringa eða einn sólarhring við stofuhita. Takið innmatinn úr fuglinum þegar hann er þiðnaður og notið í soð fyrir sósu. Bindið lærin saman áður en fuglinn er settur í ofninn. Smyrjið hann síðan vel með bráðnu smjöri og kryddið með salti, pipar og kalkúnakryddi. Leggið fuglinn á rist í ofnskúffu og hellið 3-4 dl af vatni í skúffuna. Hitið ofninn í 160°C og steikið fuglinn í hálftíma á hvert kíló. Sex kílóa fugl er því tilbúinn eftir þrjár klukkustundir. Eftir að steikingartíma lýkur er kalkúninn látinn standa á borði, „hvíla“, í 20 mínútur. Það heldur safanum í kjötinu og auðveldara verður að skera hann niður.

Meðlæti

1 laukur

½ sellerírót

500 g sveppir

3 dl rjómi

2 msk. sojasósa

Skerið lauk og sellerírót smátt og steikið í smjöri, fyrst laukinn og síðan sellerírótina. Hellið síðan í pott ásamt rjóma og hitið upp. Skerið sveppina í sneiðar og steikið þá í smjöri, kryddið með salti og pipar. Bætið þeim saman við rjómann. Bragðbætið með sojasóu og nýmöluðum pipar. Berið kalkúnann fram með sveppum og selleríi, soðnu grænmeti, kartöflum og góðri sósu, t.d. púrtvínsrjómasósu.

Góð sósa

Steikið innyfli úr fuglinum ásamt lauk og blaðlauk. Setjið í pott með vatni ásamt gulrótarbitum, sellerírót, ferskri salvíu, estragoni, timjan, 10 piparkornum og salti. Sjóðið í að minnsta kosti 3 klukkutíma. Sigtið soðið og bragðbætið það með púrtvíni (má vera rauðvín), smá rifsberjahlaupi og gráðaosti. Smakkið sósuna til eftir smekk. Ef afgangur er af kalkúnanum má nýta hann daginn eftir t.d. í samlokur með pestói eða chilisósu. Einnig er hægt að búa til kalkúnapasta, kalkúnaeggjaköku, kalkúnapottrétt, allt eftir smekk.