Grískur pottréttur (Stifado)

1 kg magurt nauta-, hrossa- eða svínakjöt
5 msk ólífuolía
800 g laukur
2-3 hvítlauksgeirar
1 dós tómatar, saxaðir
1 msk tómatþykkni (paste)
1 tsk hunang
2 msk rauðvínsedik
300 ml vatn
1 kanelstöng
10 allrahandaber, eða 1/4 tsk malað allrahanda
6 lárviðarlauf
1 tsk timjan eða oregano
nýmalaður pipar
salt
1 appelsína (aðeins börkurinn notaður)

Kjötið skorið í stóra teninga, 3-5 cm á kant. Olían hituð í stórum,
þykkbotna potti eða á djúpri pönnu með loki og kjötið brúnað á öllum hliðum.
Tekið upp með gataspaða og sett á disk. Laukurinn afhýddur, skorinn í
helminga (þvert yfir, ekki enda á milli). Settir í pottinn og steiktir við
meðalhita uns þeir eru ljósgullinbrúnir. Hvítlaukurinn saxaður og steiktur
með síðustu 2-3 mínúturnar. Þá er kjötið sett aftur á pönnuna. Tómötum,
tómatþykkni, hunangi, ediki, vatni, allrahanda, lárviðarlaufi, timjani,
pipar og salti bætt út í. Guli hlutinn af appelsínuberkinum flysjaður af í
breiðum ræmum, ræmurnar bundnar saman með seglgarni og settar út í. Hitað að
suðu, lok sett á pottinn og látið malla við mjög vægan hita undir loki í 2
klst eða lengur, þar til kjötið er svo meyrt að unnt er að borða það með
skeið og sósan er þykk. Vatni bætt við ef uppgufun er of mikil svo ekki
brenni við, en best er að hræra sem allra minnst. Smakkað til, e.t.v.
skreytt með steinselju, og borið fram, gjarna með soðnum hrísgrjónum og/eða
baunum. Eða jafnvel pasta, ef maður vill ekki halda sig alveg við grísku
línuna.