Grillaður lambahryggur með indversku ívafi

1 lambahryggur, fremur vænn
2 hvítlauksgeirar
1/2 tsk kummin, steytt
1/2 tsk kóríanderfræ, steytt
1/2 tsk fennikufræ, steytt (má sleppa)
1 tsk paprikuduft
chilipipar á hnífsoddi
nýmalaður pipar
salt

Hryggurinn þerraður, e.t.v. fitusnyrtur ögn, og svo er beittum hnífsoddi
stungið í hann beggja vegna hryggbeinsins á nokkrum stöðum og
hvítlauksflísum stungið í götin. Öllu kryddinu blandað saman og núið inn í
hrygginn að ofan og neðan og svo er hann látinn standa við stofuhita í um
klukkustund. Grillið hitað. Þegar það er orðið vel heitt er slökkt á öðrum
brennaranum og hryggurinn settur á grillið þeim megin, þannig að ekki sé
eldur beint undir honum. Lokað, hitinn á brennaranum sem kveikt er á
lækkaður ögn nema kalt sé í veðri, og hryggurinn grillaður í 45-60 mínútur
eftir stærð og aðstæðum. Snúið einu sinni eða tvisvar en best er að opna
grillið sem allra minnst. Ef vill má svo færa hann yfir eldinn smástund áður
en hann er tekinn af grillinu til að fá meiri lit en það ætti þó að vera
óþarfi. Látinn standa smátíma áður en hann er skorinn.

Ég hafði með hryggnum salat með tómötum og gúrkum, kartöflur soðnar nærri
til fulls og síðan skornar í helminga eða fjórðunga og steiktar (með hýðinu)
í svolítilli olíu á pönnu og kryddaðar með pipar, salti og svolitlu timjan
og oregano. Svo var ég með þrjár kryddsósur úr eða með skyri (hvítlauks- og
timjansósu, indverska raitu og guacamole blandað með skyri). Þetta passaði
allt ágætlega saman.