Dádýralæri með gulrófupressu, aspas, kantarellu og klettasalati
fyrir fjóra

Hráefni í gulrófupressu:
4 meðalstórar gulrófur
2 bökunarkartöflur
200 g smjör
100 g rifinn parmesan
salt og pipar

Aðferð:
Skerið rófurnar og kartöflurnar í ca. 2-3 mm þykkar sneiðar. Raðið rófum og kartöflum til skiptis í fast
mót og kryddið með salti og pipar á milli laga. Hitið smjör og timjan og hellið yfir allt saman. Pressið sneiðarnar saman
og setjið álpappír yfir mótið. Bakið við 150 gráður í 1-1½ klst. Kælið kássuna og hitið upp áður en
hún er borin fram.
Hráefni í sósu:
100 g þurrkaðir kantarellusveppir
3 dl villisoð/vatn og kraftur
1dl púrtvín eða rauðvín
3 skallottlaukar, fínt skornir
5 hvítlauksrif
klettasalats- eða basilmauk
klettasalat
parmesanostur
salt og pipar eftir smekk

Aðferð:
Leggið sveppina í volgt vatn í um það bil 5 mínútur. Svitið lauk, sveppi og hvítlauk varlega (ekki
brúna) og hellið síðan soðinu og víninu út í. Látið malla í 10-15 mínútur, sigtið grænmetið frá. Bætið klettasalatsmaukinu
út í og kryddið með salti og pipar.
Dádýr:
800 gr dádýralæri
3 dl olía
8 stk. einiber
5 greinar timjan/garðablóðberg

Aðferð:
Setjið einiberin, timjan og olíu í skál og leggið kjötið í marineringu yfir nótt.
Steikið kjötið svo á heitri pönnu og kryddið með salti og pipar. Setjið kjötið svo í ofninn við 120
gráður og látið það ná 50 gráðu kjarnhita. Berið fram með gulrófukássunni, sósunni og smjörsteiktum aspas.