Tómatar með spínati og furuhnetum

7-800 g tómatar, vel þroskaðir en þéttir í sér
3 msk ólífuolía
1 tsk basilíka
nýmalaður pipar
salt
2-3 msk furuhnetur
250 g ferskt spínat

Ofninn hitaður í 220 gráður. Tómatarnir skornir í fjórðunga, raðað með
skurðfletina upp í stórt, eldfast fat, olíunni dreypt yfir og kryddað með
basilíku, pipar og salti. Sett í ofninn og bakað í um 20 mínútur, eða þar
til tómatarnir eru vel meyrir og farnir að taka lit. Á meðan eru
furuhneturnar ristaðar á þurri pönnu þar til þær eru rétt að byrja að taka
lit en síðan látnar kólna. Spínatið skolað og látið renna vel af því og
allir stórir stilkar klipnir burt. Þegar tómatarnir eru tilbúnir er fatið
tekið út, spínatinu dreift yfir tómatana og blandað vel, þar til spínatið er
allt þakið olíu. Hellt á disk, furuhnetunum dreift yfir og borið fram.