Risotto með sveppum og beikoni

20 g þurrkaðir villisveppir
1,2 l vatn
1 msk Marigold grænmetiskraftur (það má nota aðrar tegundir en ég mæli með
þessari)
2 msk smjör
1 lítill laukur, saxaður smátt
1 hvítlauksgeiri, saxaður smátt
25 g hráskinka, skorin í litla bita (nota má magurt beikon)
1/2 tsk fersk rósmarínlauf, söxuð smátt
300 g risottogrjón (carnaroli eða arborio)
nýmalaður pipar
salt
50 g nýrifinn parmigiano-ostur

Sveppirnir settir í pott ásamt vatni og grænmetiskrafti, hitað rólega að
suðu og síðan er soðinu haldið rétt við suðu, allan tímann sem verið er að
búa til risottoið. Smjörið brætt í þykkbotna potti og laukur, hvítlaukur og
skinka látið krauma í því í nokkrar mínútur, þar til laukurinn er glær og
meyr. Rósmaríni hrært saman við og síðan eru hrísgrjónin sett út í og hrært
þar til þau eru gljáandi og þakin smjöri. Einni ausu af soði hellt í pottinn
og hrært rösklega. Hrært og látið sjóða við meðalhita þar til vökvinn er
allur gufaður upp eða grjónin hafa sogið hann í sig; þá er annarri ausu bætt
út í og þannig áfram. Best er að sem mest af sveppunum fari út í þegar
grjónin eru á að giska hálfsoðin. Það þarf ekki að hræra alveg stöðugt en
mjög oft og best er að hræra rösklega og gæta þess að sleifin skafi botninn
vel svo ekki brenni við. Grjónin þurfa 20-30 mínútna suðu, eftir smekk, en
flestum þykir best að þau séu meyr en þó með svolitlu ,,biti" í miðju og þá
þurfa þau um 25 mínútur. Ef soðið dugir ekki til má nota sjóðandi vatn í
staðinn. Kryddað með pipar og salti og að síðustu er u.þ.b. helmingurinn af
parmigiano-ostinum settur út í, potturinn tekinn af hitanum og hrært
rösklega þar til osturinn er bráðinn. Afgangurinn af ostinum borinn fram
með.