Blómkáls- og spergilkálsgratín með skinku

600 g blómkál
400 g spergilkál
salt
40 g smjör
1 hvítlauksgeiri, pressaður
3 msk. hveiti
350 ml léttmjólk
1 msk. ferskt timjan, saxað
hvítur pipar
150 g skinka í strimlum
125 g rifinn ostur

Hitaðu ofninn í 200°C. Skerðu bæði blómkál og spergilkál í stóra kvisti, flysjaðu ef til vill spergilkálstönglana og skerðu þá í sneiðar eða bita. Sjóddu kálið í saltvatni í um 5 mínútur. Bræddu smjörið í öðrum potti, settu hvítlaukinn út í, stráðu hveitinu yfir og hrærðu vel. Helltu mjólkinni út í smátt og smátt og hrærðu stöðugt á meðan, þar til sósan er slétt og jöfn. Kryddaðu hana með timjani, pipar og salti og láttu malla í 3-4 mínútur. Helltu vatninu af kálinu og settu það svo í eldfast fat. Settu skinkustrimla og rifinn ost út í sósuna og hrærðu þar til osturinn er bráðinn. Helltu sósunni jafnt yfir kálið og bakaðu gratínið þar til það er gullinbrúnt, í um 20-25 mínútur.