Lambakjöt fyllt með fetaosti og rósmarín
Rósa Guðbjartsdóttir

Góð lambasteik er sannkallaður veislumatur og með fyllingu verður kjötið sérlega meyrt og bragðgott. Fyrir 4-6.

2 lambainnanlæri
4-5 msk. rautt pestó
3-4 greinar ferskt
rósmarín
4-5 msk. fetaostur
klettasalat, spínat eða
annað grænt salat
salt og grófmalaður
pipar
Berjið lambainnanlærin með buffhamri þar til stykkin eru orðin nokkuð jafn þykkir og stórir ferningar. Smyrjið pestó yfir stykkin báðum megin og látið marinerast í a.m.k. hálftíma, gjarnan í sólarhring. Saxið rósmarínnálarnar og sáldrið yfir kjötsneiðarnar. Skiptið fetaostinum jafnt á kjötstykkin og setjið smávegis af grænu salati með ostinum. Rúllið kjötstykkjunum upp og lokið þeim með tannstöngli. Leggið upprúlluð fyllt kjötstykkin í eldfast mót, sáldrið söxuðu rósmaríni yfir og saltið og piprið. Grillið í 220 gráðum heitum ofni í um 10 mínútur. Lækkið hitann þá niður í 175 gráður og bakið áfram í um 25 mínútur til viðbótar. Slökkvið á ofninum og látið kjötið vera þar í nokkrar mínútur áður en það er tekið út og borið fram. Berið fram með sætum kartöflum en þær eru að mínu mati algjörlega ómissandi sem meðlæti um hátíðarnar. Hér fylgir ein „hátíðleg“ tillaga að matreiðslu þeirra.