Fiskiterrine

Grunnfars
500 gr nýr fiskur (lúða, lax, ýsa, þorskur, silungur, humar)
5 dl rjómi
3 eggjahvítur
10-15 gr salt
cayennapipar á hnífsoddi

ef notað er spínat, paprika eða saffran í farsið.
200 gr ferskt spínat (minna ef notað er frosið)
200 gr fersk paprika
0,5 gr saffran látið liggja í rjómanum í 60 mín

Fiskurinn er skorinn í bita og settur í matvinnsluvél ásamt eggjahvítu, salti og cayenna pipar og allt maukað vel saman. Þá er rjómanum bætt út í og maukað í nokkrar sek. Ef notað er spínat eða paprika er það maukað með fiskinum og eggjunum áður en rjóminn fer í blönduna. Smakkið farsið það á að vera frekar bragðmikið, þar sem bragðið dofnar við eldun.
Ef notað er spínat er stöngullinn rifinn frá blöðunum og blöðin soðin í vatni í ½ mín. Þá er spínatið veitt upp úr vatninu og kælt í klakavatni, þegar það er orðið kalt er vökvinn undinn úr spínatinu og það saxað niður með hníf áður en því er blandað í farsið.
Ef paprika er notuð er hún pensluð með olíu og bökuð í smá stund við 200°C eða þangað til húðin fer að losna af henni, þá er húðin tekin af og kjarninn tekinn úr, paprikukjötið saxað smátt áður en því er blandað saman við farsið.
Farsið sett í form
Setjið plastfilmu í formið sem á að nota, ef notað er fars í tveimur eða fleiri litum er það sett í sprautupoka, ekki nota túðu á pokann. Leggið formið á hliðina of sprautið fyrst með þeim lit sem á að vera yst og jafnið farsið út með litlum spaða, gott er að frysta formin á milli þess sem litunum er raðað í formið. Fallegt og gott er að setja í miðju litinn humarhala eða rækjur, passið að fylla ekki formið, því að í lokin er það fyllt með sama lit og er hafður yst. Þegar formið er orðið fullt er lögð plastfilma ofan á og það soðið við gufu í ofni við 70°C þar til kjarnhiti hefur náð 60°C. Þá er terrínið kælt og skorið í sneiðar til framreiðslu. Gott er að bera með því sósu úr sýrðum rjóma og piparrót sem bætt er með sítrónu, salti og pipar.