Léttur fiskréttur í hátíðarbúningi

Fiskur með appelsínuberki og humarsósu. (Handa fjórum)

Hráefni:

400 g fiskflök

½ tsk. salt

1–2 hvítlauksrif

1 tsk. matarolía

½–1 dós matreiðslurjómi

½ dl léttmjólk

1½ msk. Oscar humarkraftur

rifinn börkur af ½ appelsínu

5 stilkar fersk timjanlauf eða 1 msk. þurrkuð

4–5 rækjur og 3 ræmur rifinn

appelsínubörkur til skrauts á hvert fiskstykki

Aðferð:

Hreinsið fiskinn, skerið í meðalstór stykki og stráið salti yfir. Merjið hvítlaukinn og mýkið í olíunni. Bætið matreiðslurjómanum, léttmjólkinni, humarkraftinum, appelsínuberkinum og timjanlaufunum á pönnuna. Sjóðið augnablik og hrærið í á meðan. Leggið fiskstykkin á pönnuna og látið þau sjóða í sósunni þar til fiskurinn er á mörkum þess að vera hvítur í gegn (opnið eitt fiskstykkið í miðjunni til að sjá hver staðan er). Gætið þess að ofsjóða ekki, fiskurinn heldur áfram að sjóða í eigin safa eftir að hann hefur verið tekinn af hitanum. Skreytið fiskstykkin með rækjum og rifnum appelsínuberki. Berið fram með soðnum kartöflum eða hrísgrjónum, grænmetissalati og snittubrauði.

Hátíðarútgáfa:

Þessa uppskrift má gera að hátíðarmat með því að bæta humri út í hana og litli humarinn sem fæst í stórmörkuðum er bæði ágætur og ódýr. Skelflettið hann og hreinsið og bætið honum út í réttinn á pönnunni síðustu 2 mínútur suðutímans. Timjankartöflur eru góðar með þessum rétti ef tími vinnst til en góðar soðnar kartöflur eða hrísgrjón eru líka góð með.