Grilluð bleikja

1 bleikja, 800 g - 1 kg
10-15 timjangreinar
rifinn börkur af 1 sítrónu
1/2 tsk kóríanderfræ, steytt (má sleppa)
nýmalaður pipar
salt
2 msk ólífuolía
1/2 gúrka, skorin í þunnar sneiðar
1 sítróna, skorin í báta

Grillið hitað. Bleikjan skoluð og roðið skafið og hún síðan þerruð með
eldhúspappír. Timjangreinum, sítrónuberki og hluta af kryddinu blandað saman
og þetta sett inn í bleikjuna. Henni síðan lokað með 2-3 kjötnálum eða
tannstönglum. Bleikjan er svo pensluð með olíunni eða velt upp úr henni,
krydduð með afganginum af kryddinu, sett á grillið og hún grilluð við
meðalhita í um 9 mínútur á hvorri hlið. Gúrkusneiðum og sítrónubátum raðað á
fat, bleikjan sett í miðjuna og borið fram.

Ég hafði með þessu grillaðar kartöflusneiðar og kastaníusveppi, velt upp úr
ólífuolíu og kryddað með kóríanderfræi, pipar og salti - kartöflusneiðarnar
voru skornar í 8-10 cm þykkar sneiðar og grillaðar við nokkuð góðan hita í
4-5 mínútur á hvorri hlið, eða þar til þær voru alveg meyrar og höfðu tekið
góðan lit. Sveppirnir voru settir á grillið með stilkinn upp og grillaðir í
5-7 mínútur, ekki snúið.