Fljótlegur saltfiskréttur

2 – 300 gr. saltfiskur (soðinn án roðs)
nokkrar meðalstórar kartöflur
1 laukur
1 – 2 hvítlauksrif
1 – 2 gulrætur
½ rauð
½ græn paprika
venjuleg ólífuolía
smjör

Olía og smjör er hitað á pönnu eða í þungum potti við frekar lágan straum. Kartöflurnar skornar í munnbita, laukurinn og hvítlaukurinn smátt, gulræturnar í sneiðar og paprikan í strimla. Kartöflurnar eru látnar krauma í 5 mín., þá er lauk og hvítlauk bætt út í og látið krauma í aðrar 5 mínútur. Nú er grænmetinu ýtt aðeins til hliðar og búið til pláss fyrir saltfiskinn. Gott er að setja smjörklípu í plássið áður en fiskurinn er settur þar. Paprikunni er líka bætt útí nema að hún eigi að vera hrá. Hún gefur allavega fallegan lit.
Það er líka hægt að bæta fínskornum tómötum útá pönnuna eða jafnvel tómötum úr dós. Þetta á sérstaklega við ef lítil feiti er notuð. Best er þó að spara ekki smérið og/eða olíuna ekki frekar en Spánverjarnir, Portúgalarnir og suður frakkarnir (og sleppa tómötunum).

Það má líka sjóða grænmetið sér, steikja saltfiskinn (soðinn) með lauk og hvítlauk á pönnunni (hann (fiskurinn)er ægilega góður þegar hann hefur fengið smá skorpu) og e.t.v. bæta grænmetinu útá pönnuna rétt í lokin en mér finnst skemmtilegast að bera þetta fram í pönnu eða grunnum potti og hafa innihaldið þannig að fallegt sé á að líta.

Meðlæti eins og tapenade, pesto eða kóríanderlauf passar mjög vel með þessu.