Fiskfingur

600 g fiskflök (ýsa, þorskur eða annar fiskur), 1 laukur, skorinn í bita, 1 msk paprikuduft, safi og rifinn börkur af ½ sítrónu, nýmalaður pipar, salt, 1 egg, 4 dl fersk brauðmylsna, olía til steikingar

Fiskurinn roðflettur, beinhreinsaður og skorinn í bita. Laukurinn saxaður í matvinnsluvél og fiskurinn settur út í og maukaður (eða fiskur og laukur er hakkaður í hakkavél). Kryddið og sítrónubörkurinn hrært saman við og síðan eggið. Helmingnum af brauðmylsnunni hrært saman við og bætt við ef þarf; farsið á að vera svo þykkt að hægt sé að móta úr því með höndunum. Olían hituð á pönnu. Farsið mótað í aflanga stauta, ferkantaða eða sívala, 2-3 sm í þvermál, sem er velt upp úr brauðmylsnu, settir á pönnuna og steiktir gullinbrúnir á öllum hliðum við meðalhita. Sítrónusafa dreypt yfir og stautarnir bornir fram t.d. með tómatsósu, sítrónubátum og kartöflum, nýjum eða frönskum.