Eplaþorskur

Rakst á ansi skemmtilega uppskriftabók sem heitir fiskveisla fiskhatarans eftir Gunnar Helga Krisinsson, ég mæli eindregið með þessari bók, ekki eingöngu uppskriftanna vegna heldur er hún bráð skemmtileg. Hér kemur ein uppskrift þaðan.

Vænt grænt epli er úrkjarnað , skrælt og skorið í 17 bita. Það er síðna steikt í smjöri þar til það er farið að fá á sig klesst brúnt útlit. Eplabitunum er haldið heitum og smjörið geymt því það er notað síðar í uppskriftinni. Um það bil 1 kg af þorskflökum er roðflett, úrbeinað og skorið í smærri bita. Fiskurinn er síðan komið fyrir í  potti með tæplega hálfum lítra af eplasíder og saltað hæfilega. Suðan er látin koma upp við vægan hita og þorskurinn látinn malla rétt undir suðumarki í 5-10 mínútur, eftir stærð þorskbitanna. Þorskinum haldið heitum.
Með eplaþorskinum er borin fram eplasósa. Smjörið sem eplin voru steikt í er hitað aftur og 3 msk af hveiti hrært út í. Út í þetta er smám saman hrært 2-3 dl af síders-þorsksoðinu og 2-3 msk af rjóma og látið sjóða við vægan hita í 10 mínútur. Sósan er sóna tekin af hellunni, lageruð með 2 eggjarauðu og bragðbætt með eplaediki (eftir smekk), salt og pipar.
Fiskunum er komið fyrir á fati, sósunni hellt yfir og eplunum stráð yfir allt saman. Svona þorskur er góður með hasselback-kartöflum.
Slatti af kartöflum  er skrældur og skorinn í þunnar sneiðar að 3/4 hlutum í gegn þannig að þær hangi saman á þessum fjórðungi sem eftir er óskorinn. (Mjög klaufskir lesendur geta lagt kartöfluna í skeið og skorið þar til hnífurinn stöðvast af skeiðinni) Kartöflunum er komið fyrir í 200°C heitum ofni og þær smurðar með bráðnu smjöri á 10 mín fresti. Þegar þær eru að verða til (eftir rösklega einn of hálfan klukkutíma) er stráð yfir þær parmesanosti og hann látinn steikjast með kartöflunum síðustu 5 mínúturnar í ofninum.

Svona hljóðaði uppskriftin, ég ætla hér til að auðvelda innkaup að draga saman það hráefni sem fer í uppskriftina.

Grænt epli
smjör
1 kg Þorskflök
3 msk hveiti
eplasíder
2-3 msk rjómi
2 eggjarauður
salt og pipar
Kartöflur
Parmesanostur