Jógúrtbúðingur með gómsætri ávaxtasósu (Handa sex til sjö)

Hráefni:

4 blöð matarlím

2–2½ dl rjómi

2½ dl léttjógúrt með því bragðefni

sem ykkur finnst best (eða

léttsúrmjólk)

2 msk. sykur

1 tsk. vanillusykur ef notuð er léttsúrmjólk/jógúrt með vanillubragði (annars ekki víst að vanillubragð passi)

½ dl sjóðandi vatn

Aðferð:

Leggið matarlímið í bleyti í kalt vatn. Þeytið rjómann. Þeytið jógúrtina/léttsúrmjólkina með sykrinum og vanillunni ef hún er notuð. Hellið kalda vatninu af matarlíminu og bræðið það með sjóðheitu vatninu. Látið mesta hitann rjúka úr. Hellið matarlíminu út í jógúrtina/ léttsúrmjólkina. Bætið þeyttum rjómanum út í blönduna. Hellið blöndunni í kringlótt form. Kælið hana í að minnsta kosti 2–3 klukkustundir þannig að hún stífni. Berið fram með jarðarberjasósu og skreytið með ferskum berjum. Þessi uppskrift getur ekki misheppnast ef þess er gætt að matarlímið sé heitt en ekki hálfvolgt þegar það er sett út jógúrtina og er mun fljótlegri í matreiðslu en venjulegur frómas. Uppskriftin er fengin úr gamalli matreiðslubók og er alltaf jafngóð.

Hátíðarútgáfa:

Merjið 1 öskju af jarðarberjum (jafnvel meira) og sykrið eftir smekk. Hitið og berið fram heitt með köldum jógúrtbúðingnum.

Hráefni:

Ávaxtasósa úr ferskum ávöxtum

2 dl jarðarber (kíví, hindber eða mangó) um það bil 1 msk. strásykur

Aðferð: Hreinsið berin (eða flysjið kívíin/ mangóið), setjið í matvinnsluvél og maukið. Þynnið með ávaxtasafa ef með þarf. Sykrið og berið fram.