Stollenbrauð

Stollenbrauðið þýska er fallegt og bragðast vel með smjöri heitu súkkulaði. Það er upprunnið í Dresden í kringum 1450 og átti upphaflega að minna á Jesúbarnið í reifum en lagið og liturinn minnti á námuverkamennina á innganginn í námuna. Af því er nafnið dregið. Stollen þýðir námuop. Gerð þess tekur smá tíma þar sem deigið þarf að lyfta sér yfir nótt en að öðru leiti er afa einfalt að búa það til.

3 3/4 bollar hveiti
1 bolli sykur
1/2 bolli volg mjólk
3 tsk ger
9 msk mjúkt smjör
1 egg
1/2 tsk salt
1 tsk vanilludropar
1 msk romm
kanill eftir smekk
rifinn börkur af hálfri sítrónu
1 bolli möndlur
1/4 bolli sykraður sítrónubörkur
1/4 bolli sykraður appelsínubörkur
1 1/4 bolli rúsínur

Snjór
6 msk smjör
3/4 bollar flórsykur

Sigtið hveitið í skál og gerið holu í miðjuna. Hellið 1/4 bolla af sykri og 1/4 bolla af mjólk í. Stráið gerinu yfir mjólkina og smá hveiti yfir gerið. Látið gerið jafna sig í tuttugu mínútur. Bætið afganginum af innihaldinu, nema mjólkinni saman við. Notið svo örlítið af mjólk til að hnoða deigið saman. Breiðið hreint og rakt viskustykki yfir og látið lyfta sér yfir nótt. Hnoðið deigið aftur í eina mínútu og setjið svo á smurða bökunarplötu. Ýtið rúsínum aftur inn í deigið ef þær standa úr úr svo að þær brenni ekki. Penslið brauðhleifinn með afganginum af mjólkinni og bakið í forhituðum ofni við 180°C í 50 mínútur. Brauðið ætti að vera gullinbrúnt. Penslið með smjörinu á meðan brauðið er enn heitt og stráið flórsykrinum yfir. Endurtakið ferlið nokkrum sinnum til að fá fallega hvíta áferð og til að stollenbrauðið geymist í margar vikur. Geymið í að minnsta kosti viku áður en borðað er.