Baka

Bökudeig:

200 g hveiti
75 g smjör
1 lítið egg
svolítið salt
1/4 tsk salatkrydd frá Ducros (crutités; má sleppa)

Fylling:

100 g ricotta-ostur eða kotasæla
1 eggjarauða
3-5 msk matreiðslurjómi eða mjólk
1/2 tsk ólífumauk (tapenade)
1/2 tsk paprikuduft
chilipipar á hnífsoddi
5-6 basilíkublöð, söxuð
nýmalaður pipar
salt
200 g reyktur lax (helst taðreyktur)

Bökudeig:
Ofninn hitaður í 200 gráður. Allt sett í matvinnsluvél og hnoðað saman, eða
einfaldlega mulið og hnoðað saman í höndunum. Smávegis hveiti bætt við ef
deigið er of lint, köldu vatni ef það er of þurrt. Flatt út fremur þunnt og
stungnir úr því 12 hringir sem lagðir eru yfir lautirnar á smábökuplötunni,
ef slíkt þarfaþing er fyrir hendi; annars má bara stinga út eins marga
hringi og þurfa þykir og raða þeim á pappírsklædda bökunarplötu. Pikkað með
gaffli, sett í ofninn og bakað í um 8 mínútur, eða þar til bökuskeljarnar
eru farnar að taka lit. Þá eru þær teknar út og fylltar (þær mega alveg
kólna á meðan).

Fylling:
Ostur, eggjarauða, 3 msk rjómi eða mjólk, ólífumauk, paprikuduft, chilipipar
og basilíkublöð sett í matvinnsluvél eða blandara og hrært þar til komið er
slétt mauk. Meiri rjóma eða mjólk bætt út í ef maukið er mjög þykkt (en það
á að vera svo þykkt að það renni ekki út). Kryddað með pipar og salti eftir
smekk og síðan skipt jafnt á bökuskeljarnar/tartaletturnar. Laxinn skorinn í
12 fremur þykkar sneiðar, ein samanbrotin sneið lögð ofan á fyllinguna í
hverri böku, og þær síðan settar í ofninn og bakaðar við 180 gráður í 6-8
mínútur. Bornar fram volgar (reyndar eru þær ágætar kaldar líka).

Ef þessar smábökur eru hafðar sem forréttur er gott að hafa með þeim einfalt
salat, t.d. eikarlaufssalat og saxaða, fræhreinsaða tómata.