Súkkulaðibúðingur með jarðarberjum

200 g jarðarber
150 g gott, dökkt súkkulaði (t.d. Lindt)
100 ml vatn
3 egg
1 1/2 msk Grand Marnier
3 msk sykur

6 falleg jarðarber tekin frá en hin hreinsuð og skorin í þunnar sneiðar.
Súkkulaðið brotið í bita og sett í pott ásamt vatninu. Hitað rólega og hrært
þar til súkkulaðið er bráðið. Látið malla áfram við vægan hita í 1-2
mínútur, eða þar til blandan þykknar ögn, og hrært nærri stöðugt á meðan.
Potturinn tekinn af hitanum, látið kólna í 1-2 mínútur og á meðan eru eggin
aðskilin og rauðunum þeytt saman við súkkulaðið. Líkjörnum hrært saman við.
Hvíturnar þeyttar þar til þær eru nærri stífar og síðan er sykrinum bætt
smátt og smátt út í og þeytt áfram þar til hvíturnar eru alveg stífar.
Blandað gætilega saman við súkkulaðið. Helmingnum af blöndunni skipt á 6
souffléform, skálar eða bolla, jarðarberjasneiðum raðað ofan á og afganginum
af blöndunni hellt yfir. Sett í kæli og látið stífna í a.m.k. 2 klst og
gjarna í allt að 6 klst. (Ef svo ólíklega vill til að búðingurinn stífnar
ekki, eða ef maður er að flýta sér, má nota Plan B.) Eitt jarðarber sett á
hvern búðing og borið fram, e.t.v. með dálitlum þeyttum rjóma.

Plan B: Þetta er hrikalega góð sósa út á vanilluís.