Slátur

Reyndar húsmæður segja að best sé að sauma vambirnar daginn áður en hin eiginlega sláturgerð hefst. Nú má reyndar kaupa vambirnar forsaumaðar en fyrir þá sem þyrstir í saumaskap fylgir mjúkt bómullarband oft með sláturpakkanum sem keyptur er. Mikilvægt er að sauma keppina með gisnum sporum og muna að hafa opið sem skilið er eftir ekki of þröngt. Úr hverri vömb eru sniðnir fjórir til sex keppir. Áður en að saumaskapnum kemur þarf þó að skola hreinsaðar vambir úr köldu vatni og skafa og hreinsa þær ef með þarf, gæta þess þó að þær rifni ekki. Hægt er að geyma vambirnar í saltvatni í kæliskáp í nokkra daga, þannig að þær má sauma og hvíla sig svo áður en að eiginlegri sláturgerð kemur. Þá er að hreinsa mörinn, en eitlarnir eru þá hreinsaðir frá. Brytjið mörinn niður, oftast er talað um að hafa hann á stærð við litla sykurmola. Mörinn má líka geyma í kæliskáp þangað til honum er blandað saman við en ekki mikið lengur en dag. - jma Fréttablaðið

BLÓÐMÖR
(í 15 keppi)
1 l blóð
2 dl vatn
1 msk. salt
400 g haframjöl
500 g rúgmjól
500 g mör

Blóð og vatn er síað saman gegnum fíngert sigti. Hrærið salti saman við þar til það leysist upp og gott er að nota bala. Hrærið haframjöli saman við með sleif og svo rúgmjölinu en blandan á að vera örlítið þynnri en lifrarpylsuhræran. Að lokum fer mörinn saman við. Saxað grænkál og fjallagrös eru oft notuð í blóðmör og þykja góð með en þá þarf aðeins minna af mjöli. Hálffyllið keppina og saumið fyrir. Notið sömu aðferð við suðu og geymslu og í lifrarpylsuuppskriftinni.

 
LIFRARPYLSA
(Í 12 keppi)
4 stk. nýru
2 stk. lifur
1 msk. salt (má vera örlítið minna)
1/2 l mjólk, undanrenna eða kjötsoð
150 g haframjöl
50 g hveiti
400 g rúgmjöl (má einnig nota heilhveiti)
500 g mör

Skolið lifur og nýru, skerið í bita, hreinsið stærri æðar úr og setjið svo í hakkavél. Gott er að hakka hráefnið tvisvar ef vélin er gróf. Saltinu er blandað saman við mjólkina (sumir setja líka 3 til 4 msk. af sykri með) og hrært saman þar til saltið er uppleyst. Gott er að nota stóran bala undir allt saman. Blandið kjöthakkinu og mjöli smám saman út í vökvann og mörnum skal blanda saman við síðast. Gott er að miða við, til að fá rétta þykkt á deigið, að það renni ekki út sé það sett á disk. Það á bæði við blóðmör og lifrarpylsu að strjúka þarf vætuna vel af keppunum þegar þeir eru teknir úr saltvatninu. Ekki setja of mikið af hrærunni í hvern kepp, gott er að miða við að helmingsfylla. Saumið fyrir gatið, strjúkið keppinn og jafnið þannig innihaldið (og passið að ekki myndist loftbólur). Þá keppi sem á að geyma og ekki sjóða strax í matinn má setja í frystikistuna,
en mikilvægt er að koma óðsoðnum sláturafurðum eins fljótt og hægt er í frost. Slátur geymist í 6 til 8 mánuði í frysti. Þá keppi sem á að hafa til matar skal hins vegar sjóða strax. Setjið ekki of marga keppi í pottinn, það er betra að rúmt sé um þá. Þegar keppirnir fljóta upp skal stinga í þá með nál og hleypa loftinu út. Suðutími er þrjár klukkustundir.