Kartöflugratín Heklu

800 g-1 kg kartöflur, t.d. Gullauga
1 msk smjör
nýmalaður pipar
salt
klípa af oregano
200 g KEA-skyr, hreint
2 egg
100 ml mjólk
10 cm bútur af blaðlauk, saxaður smátt
2 msk nýrifinn parmesanostur (má sleppa)

Ofninn hitaður í 180 gráður. Kartöflurnar skornar í þunnar sneiðar, 2 mm eða
svo (hér kemur matvinnsluvél með skurðarskífu sér afar vel). Meðalstórt
eldfast fat smurt með smjörinu, kartöflusneiðum raðað á botninn og þær
látnar skarast. Dálitlum pipar, salti og oregano stráð yfir og öðru lagi
raðað ofan á og þannig áfram þar til kartöflurnar eru búnar. Skyr, egg,
mjólk og saxaður blaðlaukur hrært saman í skál, kryddað með pipar og salti
og hellt jafnt yfir. Sett í ofninn í hálftíma. Þá er ostinum stráð yfir og
bakað í 15-30 mínútur í viðbót, eftir því hve stórt fatið er (best er að
stinga prjóni í miðjuna og ef hann gengur auðveldlega í gegn ætti gratínið
að vera tilbúið). Borið fram t.d. með steiktu eða grilluðu kjöti.