Hvítlauksræktun í garðinum heima

Það er sáraeinfalt að rækta sinn eigin hvítlauk. Fyrst er bara að kaupa nokkra hvítlauka í kjörbúðinni (betra er að þeir séu lífrænt ræktaðir) hluta þá í sundur og pota geirunum niður í mold að hausti. Hver geiri verður svo að heilum lauk að vori ef vel tekst til við ræktunina.
Þá er bara að færa sig út úr eldhúsinu og út í garð og búa til litlar holur í moldina með um tuttugu sentimetra millibila og setja einn hvílauksgeira niður í hverja holu. Mjói endinn á að snúa upp og svo er svolítilli mold sópað yfir. Hvítlaukur vex mest í frjórri mold svo það getur borgað sig að blanda ofurlítilli moltu eða húsdýraáburði saman við moldina. Svo er bara að þreyja þorrann og bíða vorsins.
Hvítlaukur er ein fyrsta plantan sem skýtur kollinum upp úr moldinni á vorin. Hvítlauksblöðin sjálf eru afar bragðgóð og það er gott að klippa eitt eða tvö blöð af hverri plöntu, saxa niður og setja í salat. Blöðin færa lauknum sem vex ofan í moldinni næringu svo það er vænlegast að varast græðgi og taka aldrei fleiri en tvö í einu til að skerða ekki næringarupptöku lauksins.
Í júní vaxa  upp blóm af hvítlauknum en það er besta að klippa þau strax af því annars eyðir laukurinn öllum sínum kröftum í að blómstra og laukurinn sjálfur verður matarlítill og væskilslegur. Þegar tveir þriðju hlutar grænu laufanna fara að visna , en það gerist oftast í júní mánuði, er kominn tími á uppskeru. Þar sem hvítlaukurinn liggur ofarlega í moldinni er alveg nóg að nota venjulegan matargaffal við uppskeruna og bara róta eftir lauknum í moldinni.
Eftir uppskeruna tekur mikilvægasti hluti ræktunarinnar við en það er þurrkun lauksins. þá er gott að binda laukknippin saman og hengja þau upp á hlýjum og þurrum stað í þrjár vikur, Þetta eykur geymslutíma lauksins til muna og gerir það a verkum að hægt er að elda dýrindiskrásir úr himneskum heimaræktuðum hvítlauk fram eftir vetri.