Dönsk lifrakæfa að hætti Nönnu Rögnvaldar

500 g svínalifur
200 g svínaspekk
50 g smjör
50 g hveiti
125 ml mjólk
250 ml gott kjötsoð (eða vatn og kjötkraftur)
1 stórt egg
1 1/2 laukur
2 hvítlauksgeirar
6 ansjósuflök (má sleppa)
lauf af 3-4 timjangreinum
1/2 tsk allrahanda (helst nýmalað)
3 tsk salt, eða eftir smekk
e.t.v. beikonsneiðar

Skerið lifrina og spekkið í bita. Hakkið spekkið sér í hakkavél og setjið til hliðar (ef hakkavél er ekki fyrir hendi má skera það mjög smátt með hníf og setja svo í matvinnsluvél). Hakkið lifrina eða maukið í matvinnsluvél, fínt eða gróft eftir smekk. Bræðið smjörið í potti, hrærið hveitið saman við og bakið upp í jafning með mjólkinni og kjötsoðinu. Setjið spekkið út í og hrærið vel. Látið jafninginn kólna. Hitið ofninn í 175°C. Saxið laukinn og maukið í matvinnsluvél ásamt hvítlauk, ansjósum, eggi og kryddi. Bætið lifrinni og jafningnum út í og látið vélina ganga þar til allt hefur blandast vel. Hellið blöndunni í eitt stórt form eða nokkur minni og leggið beikonsneiðarnar ofan á (eða steikið þær á pönnu og leggið ofan á þegar kæfan er tilbúin). Bakið kæfuna í ofninum í 30-45 mínútur eftir stærð (það má líka frysta hana og setja hana svo beint í ofninn en þá þarf hún 15-20 mín í viðbót). Í staðinn fyrir allrahanda mætti líka nota negul og engifer á hnífsoddi, og það á ekki að skera piparinn við nögl. Best er að athuga hvort kæfan er hæfilega krydduð með því að steikja svolitla lummu á pönnu og smakka.